A banda coruñesa vén de rematar xira por Latinoamérica, onde ofreceu senllos concertos en Santiago de Chile, Córdoba, Bos Aires e Montevideo, onde esgotou entradas en todas as prazas

A banda está na metade da xira de presentación do seu novo disco, ‘Ribeira Sacra’, con máis de 80 concertos

Próximos concertos en Galicia: Lugo (14 de decembro) e Vigo (29 de xaneiro)

Luar Na Lubre, unha das bandas de referencia da música folk do noso país, vén de regresar dunha xira por América Latina, onde tivo unha grande acollida, congregando máis de 5.000 espectadores en catro concertos en Chile (Santiago), Arxentina (Córdoba e Buenos Aires) e Uruguai (Montevideo). Neste vídeo podedes ver imaxes do seu concerto en Bos Aires: https://youtu.be/5jtXc92kzMU

Foron concertos moi emotivos, tamén por mor da masiva presenza de público de ascendencia galega. Ademais, Bieito Romero ofreceu unha charla no instituto galaico-arxentino Santiago Apóstol, que realiza un importantísimo labor de recuperación e divulgación da cultura galega en Bos Aires. 

Luar Na Lubre segue a espallar a música, o idioma, e a cultura galega en diferentes lugares do mundo, desta volta co seu novo disco, ‘Ribeira Sacra’. A súa xira de máis de 40 concertos levounos por toda Europa (Reino Unido, Francia e Bélxica), América Latina, con especial presenza, por suposto, na Península e en Galicia. E aínda lle quedan outros 40 por realizar durante este remate de 2018 e comezos de 2019. 

Aquí en Galicia ofrecerá nas vindeiras semanas tres concertos: o vindeiro 14 en Lugo (Auditorio Gustavo Freire) e o 29 de xaneiro en Vigo (Teatro Afundación).

A banda liderada por Bieito Romero gravou en 2017 e 2018 este novo traballo discográfico no Mosteiro de San Pedro de Rocas (Esgos, Ourense), que ten como obxectivo poñer en valor a través da música a riqueza histórica, etnográfica, natural e monumental deste territorio.

‘Ribeira Sacra’ 

Este novo disco inclúe 26 temas que proveñen de composicións propias, música tradicional e melodías “que van lembrar e remarcar todo o patrimonio que temos na Ribeira Sacra”, en palabras de Bieito Romero, que salientou que esta é a primeira vez que se fai un disco destas características para potenciar e difundir a Ribeira Sacra a través da música”, un territorio “que é desde sempre patrimonio da humanidade, aínda que oficialmente aínda non, e a nosa idea é poder falar coa grandeza da Ribeira Sacra, potenciándoa a través da música”.

‘Ribeira Sacra’ conta con ducias de colaboradores que achegan o seu grao de area ás 26 cancións deste disco: desde Víctor Manuel ata SES, pasando pola Coral de Ruada, Nani García, a asturiana Marisa Valle Roso ou Juan A. Antepazode Astarot, Irma Macías Suárez, Brais Maceiras, entre outros moitos.

Bieito Romero remarcou na presentación que tivo lugar en Ourense que esta gravación “tocoume no corazón, porque as miñas orixes están na Ribeira Sacra, e ademais, para todos supuxo un proxecto moi especial porque comezamos a traballar nel na data en que os lumes fixeron estragos en Galicia, e o feito de estar nun territorio de tal alto valor natural, como é a Ribeira Sacra, nos fixo arrancar con moita tristura”. Romero lembrou o labor etnográfico e de recolleita de sons naturais e testemuñas que enriqueceron este traballo musical. “Fumos polas aldeas a falar coa xente, recollemos sons de vento, carros, campás, e tamén imaxes de nevaradas, amenceres..., de tal xeito que neste traballo mestúrase a música co ambiente da Ribeira Sacra”. A súa pretensión, remata,  “foi acadar unha banda sonora humana e natural”.

O traballo discográfico recolle tamén nas letras feitos e personaxes históricos, como Romasanta, e de lenda, como os Felos de Maceda e Esgos, de fonda tradición etnográfica no entroido, ademais de textos en barrallete, a linguaxe dos afiadores.

Luar Na Lubre

A banda liderada por Bieito Romero volve cun novo traballo despois cun dobre CD recompilatorio no que celebraba os seus 30 anos de traxectoria indiscutible. Luar Na Lubre foi premiada en numerosas ocasións con recoñecementos tanto a nivel galego e local, como a nivel estatal, con nove Premios da Música concedidos pola "Academia de las Artes y de la Música" ou cos dous discos de ouro por dous dos seus traballos ao superar as 50.000 copias vendidas en cada un de eles. O primeiro deses discos (Plenilunio) foi entregado por Mike Oldfield na súa casa de Londres, e alí foi onde o músico británico versionou "O Son Do Ar" retitulándoo como "The song of the sun" e incluíndoo como track número 1 do seu álbum ‘Voyager’ no ano 1996. Este momento foi transcendental para a historia da banda, xa que abriu a posibilidade de que a súa música fose coñecida por un público máis amplo.

Luar Na Lubre son:

Bieito Romero (gaitas, acordeón e zanfona)

Irma Macías (voz)

Antía Ameixeiras (violín)

Patxi Bermúdez (Bodhran, tambor, djembé)

Pedro Valero (guitarra acústica)

Xavier Ferreiro (percusión latina, efectos)

Xan Cerqueiro (frautas)

Brais Maceiras (acordeón diatónico)       

Poden descargar fotos e mp3 aquí. 

Vídeo explicativo do proxecto:  https://youtu.be/rHT7BWJw1q4

Web: www.luarnalubre.com